انتم عارفين يعني ايه اصلا انسان ؟! … سارة العربي _ المركز الرابع – مسابقة المقال / أوراق عربية

المتسابقة : سارة العربي السيد
مقال / مصر
العنوان : انتم عارفين يعني ايه اصلا انسان ؟!
————————–——————

لما نبص في القاموس على كلمة انسان هنلاقي “ان كلمة (انسان) اسم جنس تطلق على الذكر و الأنثى. نقول هذه انسان و هذا انسان ..يعني الانسان نصه (رجل) و نص (مرأة) ماينفعش نقول على حد واحد منهم انسان والتاني درجة أقل منه ده في اللغة , نيجي نبص بقى على التاريخ اول جامعة انشئت في العالم جامعة القرويين, بنيت كمؤسسة تعليمية لجامع القرويين الذي قامت ببنائه (السيدة) أيوة انا اقصد اني احطها بين قوسين فاطمة بنت محمد الفهري القيرواني في مدينة فاس بالمغرب سنة 245هجرية/859ميلادية (معلش شوية معلومات علشان ابان قدامكم ان أنا مثقفة) و الجامعة دي لسه موجودة لغاية دلوقتي, حد قالها مثلا ان النساء ناقصات عقل و دين! ولا انتي ست خليكي في بيتك!! ولا الناس استفادت من المؤسسة اللي هي بنتها واتخرج منها علماء فادوا العالم كله بعملهم و دراستهم,خلينا نرجع شوية في الزمن لورا, شفاء بنت عبد الله اللي كانت بتقف في السوق و بتمنع اي حد من التجار من الغش و كان سيدنا عمر بن الخطاب بيرضى بحكمها في حد طلع برده و قالها خليكي في مطبخك انتي عقلك عقل ناقص ما ينفعش تحكمي بحاجه ! مع ان الناس فضلوا عايشين في الجاهلية قرون بس التزموا بفكرة ببناء المجتمع من الانسان سواء كان (رجل) أو (مرأة) فكرة استخدام عقلية الانسان لبناء أمة, وأم عمارة اللي كانت بتروح تجاهد معاهم في الغزوات كان في حد بيقولها مثلا ده مجال للرجال فقط انما انتي ست خليكي في بيتك معززة مكرمة!! علشان تعرفوا قد ايه كان عقلية الناس وقتها اللي من قرون فاتت..,نيجي بقى نبص للموضوع من ناحية العادات و التقاليد يعني ايه الاول عادات و تقاليد شوية أفكار كده لا دين لها الناس بتنفذها بمبدأ احنا لاقيناها الحاجات من الاول فبننفذها و خلاص ممكن خوف من التغيير, خوف من المسؤولية اللي بتصاحب التغيير ده, خوف من المجتمع اللي بيشوف اي حد بيخالف العادات دي كــ…(صفات وحشة استغفر الله العظيم) يعني أنأ مثلا مهندسة اتصالات والكرونيات بقالي سنتين متخرجة مش لاقية شغل( مش بتمنظر عليكم ولا حاجة بس قصدي اوضح مثال في الحياة الواقعية ) علشان السبب الرئيسي في اي مكان شغل يبقى عايزين مهندسين (رجالة) فطبعا هلاقي اللي يقولي البنات ما بتتحملش شغل ممكن تتجوز و يبقى عندها اولاد فمش هتبقى قد المسؤولية وطبعا هنلاقي النماذج دي في اي مصلحة حكومية (فاهمين قصدي أكيد), أكيد أنا مش مضطرة اقولكم ان الناس مش زي بعضها و في بنات كتيير عايزه تشتغل علشان تحقق طموحها ( انا عارفة انكم هتتريقواعلى الحتة دي ) بس دي حقيقة فعلا انا عايزة اشتغل (قولو ان شاء الله ) علشان احقق جزء من اللي بتمناه استقلال مادي ,اعتماد على النفس و ربنا لما يحاسبني عملت ايه بعلمي اللي قعدت 17 سنة فيه بستثمر فيه وقتي وجهدي و تعبي و تعب أهلي ابقى عملت حاجة … طبعا الكلام ده ملوش اي 60 لازمة في مجتمعنا الجميل ده ان البنت ملهاش الا بيتها( تتجوز و تقعد في البيت) و اذا حبت تشتغل هي بتشتغل علشان تخرج و الناس تشوفها (رجعنا لموضوع الجواز تاني) ومهما حاولت و شرحت و اتكلمت عن الطموح و الاحلام هلاقي برده اللي يقول ناقصات عقل و دين خليكي في مطبخك خليكي في بيتك !! هو انا ما ينفعش ابقى الاتنين ؟! اكيد في المحيط اللي احنا عايشين فيه هنلاقي في نماذج ستات كتير بتشتغل و مراعية بيتها برده و ختى لو بقيت حاجة واحدة بس هو المجتمع ماله اصلا ؟!.. بس مجتمعنا مخه اتقفل عن القواميس و عن التاريخ و عن الدين و مسك في شوية أفكار كده قديمة و اتمسك بيها جدا , و نسى ان الانسان اساسا (رجل) و (مرأة) وان الرجل ما يبقاش انسان من غير المرأة و المرأة ما تبقاش انسان من غير الرجل ( تجيبها كده تجيلها كده هتلاقيها كده)و ان الانسان ده (رجل) و (مرأة) ليهم دور في الحياة ما ينفعش حد ينكره او يحطه في زواية صغيرة علشان يقلل منه و الا هنخسر التوازن في الحياة ..
كلمتنين من انسان