النبي والصبي …. قصيدة عامية لحامد بدر – خاص لأواق عربية
لما نزل النبي عندنا البلد
شافه الغلام ساعة عصاري
صلى عليه
وباس إيديه
وقاله حلفتك بحياة حبيبك ربنا
إدعيلي دعوة يا نبي
أنا الغلام
أنا الشباب
انا العجوز رغم الصغر
أنا الصبي
أنا اللي يا ما حلمت أشوفك
في المنام
مَلِّيني من رؤيتك
والنبي
*****
وكل شيء قدر
وكل شيء مكتوب عليا
البقا هنا أو السفر
مش معترض ولا مرتضي
اسمح لي أشكيلك أحوالنا
والحال ظاهرًا منه
أو مُختبي
*****
قعد النبي جنب الجدار
ويّا الغلام يسمعه
وبشدة وبكل اهتمام
لم يقطعه..
أنا يا سيدي
أنا المحارب
وقت الشدايد
وأنا المقتول
من يوم الميلاد
وما كان بإيدي
ووقت العصبية
معرفش أبويا
ومن وريدي
ومشوفش قدامي
أقل من رتبة غبي
*****
معذور يا سيدنا
ما انا الجاهل
أنا الصبي
سماح النوبة والنبي
أنا اللي حرموه حبه
وحلمه البسيط
قالوا عليه ملعون قريبه
وقالوا عليه الواد عبيط
*****
الدنيا مبقتش حلوة
والناس كئيبة
رافضة السلام
يحلالها الخصام
رافضة حتى أغني غنوة
يرضيك كدة والنبي؟
قاسية علينا
يا بلد
ملعون حلمنا
اللي كان
والقلب اللي صابه الزمان
والخوف والحسد
والمرض
اللي توارثهم أبي
حتى العلام مبقاش لجام
أصبح الجاهل بيفتي
في كلامك
ما يخاف خصامك
ويزيد شراره
ويعتدي
*****
صار الشباب
عيشته غريبة
وفـ دينه بقى
كل المصيبة
لا الذنب عارف يسلاه
ولا لطريق الصلاح
يهتدي
السر معدش حد يصونه
واللي يآمن لقريب يخونه
زاد الفراق بينا
والظلم ساد
فبقت ضلْمة
والدنيا ماليها العفن
البيع بقى أهون علينا
وأخوَّة مالهاش التمن
يرضيك كدة والنبي ؟
ويوم الوداع أقرب
من يوم الفرح
ويوم الوفاة
ملناش لميتنا
حُرمة
الرعب مالي القلوب
والخوف حوالينا
عشاءً وغدي
*****
زادت مشاكلنا
والقلب فااااض بالآآه
والضيق قفّل صدورنا
لكن مدد
يا رسول الله
مفيش عمار
وزاد الهدد
زاد المرار
قل السند
حتى الدموع
ملهاش عزيز
أصبحنا قِلة
ومفيش مدد
كاتم في صدري
مابوحش باللي فيه
غير لربي الواحد الأحد
أو ساعة عصاري لما خرجت
فشوفت سيدنا النبي
نازل عندنا في البلد
