المركز الأول ” شعر عامي ” ….. لحظة / عبد الرحمن قاسم _ مسابقة أوراق عربية
فازت قصيدة ” لحظة ” للمتسابق عبد الرحمن قاسم بالمركز الأول في تقييم القراء لمسابقة أوراق عربية لشهر أبريل ” شعر عامي ” …. كل الأمنيات للمتسابق بالتوفيق دوما
لحظـــه
لحظه فى حضن حبيبتى .
حبيبتى أخدها فى حضنى
ومن بحر أحزانى بتاخدنى
لشط الضحكه ترمينى
ولما الضحكه ترفضنى
وتنزل دموع عينى
ويبان فى ملامحى حزنى اللى هاددنى
تملس بايدها على جبينى
وتاخد بايدى تصالحنى على الفرحه لشطه تعدينى
وتضحك ملامحى تبان أنها أول مره بتعرف الفرحه
وجروح العمر تطيب
وأحس فى حضنها بدفه يشبه دفه الوطن
من بعد ماعشت عمرى غريب
وأنسى الواد اللى فى شبابه عرف الشيب
وأنى التفت لقيت فى راسى ميت شعره بيضه
وأنى كتبت بالدموع مليون قصيده
والف أه بدمى
أنى اتولدت لقيت الحزن فاتح دراعاته وعلى حضنه بيغصبنى
ويعصرنى كاس نخبه ويشربنى
حبيبتى
كانها بتشاور بايدها لقطار الزمن
يهدى ويسيب
من العمر حبه افرحهم
وهى معايا وفى حضنى
تلملم ضلوعى اللى اتبروا
من النوم على البلاط فى محل اللبن
وتلمع عيونى اللى من السهر انطفوا
وسعتها بتمنى لما أموت يكون حضنها هو الكفن
