مدحت حجاج يكتب لأوراق عربية ( المحاكمة) – مسرحية شعرية عاميه
مدحت حجاج يكتب لـ أوراق عربية ( المحاكمة) مسرحية شعرية من مشهد واحد
______محكمة _________
حطوني في قفص أسود لون حظي
لابس جلابية والفقر باين على وشي
ويروح شرطي ويجي شرطي ولا أنا عارف إيه حكايتي
دخل القاضي قلت هو اللي هيحكملي
تعالت الأصوات وندونى بالمذنب
ولا قالوا إسمي
سأل القاضي بتشتغل إيه
قلت على باب الله يا بيه
يوم أشيل رمل ويوم أزرع
كل يوم أصلي الفجر وأطلع
قال إسمك
قلت راضي
و جيتك ياقاضي
لجل تنصفني
وأدي ياقاضي حكايتي
جانى الجلاد لحد باب البيت
يسرق رزقي
وباللكمة من أيده كتم صوتي وحسي
وأدي ياقاضي كفه مرسوم على جسمي
عاوز جنيه كهربا وجنيه ميه
والإتنين ورثي
السد في الأصل بناه جدي .. والنيل
ياقاضي بتاع جد جدي
وأنا اللي في القناه
السخرة كسرت وسطي
_______ رفعت الجلسه ___
وقال
________الحكم بعد المدواله_______
وأنا في القفص …والحرامي بره
_
وإفتكرت حبيبتى والعيشه .. مُرة
_
قلت والنبي ..ياقاضي إنصفنا….. مرة
وبعد المدوالة .
دخل القاضي وقال إعدام
صرخت حبيبتى .. أم العيال
إيه الجريمة
قال عصيان
وأنا اللي راضي ومافي رغيف بالدار
حكمك ياقاضي ضلال في ضلال .
لمتابعة المزيد للكاتب مدحت حجاج علي موقع أوراق عربية – مسرحية شعرية
لمتابعة المزيد من الأعمال بـ موقع أوراق عربية علي فيسبوك
