هو انا زدت شويتين؟؟ ……….. رانا زيد – خاص لأوراق عربية

البنات ما اجملهم، الطف الكائنات، ومفيش غني عنهم ده شيء أكيد. والبنات دايما تلاقيهم ماشيين زاهين كدا بالوانتهم ولبسهم على اختلاف انواعه الضيق والضيق والضيق وفيه احيانا الوسط والواسع، خاصة اليومين دول، نظرا لاستيراد الملابس من الصين وكوريا علشان المصريين ابتدوا يستسهلوا ويستوردوا من بره، مع ان التكلفة تقريبا واحدة، مع اضافة تمن الشحن والجمارك وخلافه بل بالعكس الملابس المصرية افضل بكتير من ناحية الخامة والاشكال الجميلة

نرجع لموضوعنا الخاص بالملابس الصيني اللى غزت الاسواق، اساسا مقاستهم مش زى مقاستنا، وكذلك الاطوال، يعنى المفروض اللارج عندهم هو الاسمول عندنا وهكذا. بنت اختي داخلة اولى اعدادي، نزلت معاها انا واختى نجيب لبس لها، لانها مبقيتش طفلة تجيب من الاطفالى، مع انها لسا فيه مقاسها فى الاطفال، فقولنا نجيب لها من محلات البنات، وعينك ما تشوف الا النور، البنت رفيعة جدا جدا، وكان بيجي مقاسها الميديم واللارج، انا واختي بقينا نقول حرام عليهم، البنات اتعقدت خلاص،اللبس يا دوب بيجي على اد طفلة !!

وافتكرت لما كنت كل ما انزل ملقيش اللبس مقاسي اقول هو انا زدت شويتين ولا اللبس اللى انكمش! شكله الترزي اللى فى الصين ايده طويلة شوية علىا لقماش واحيانا بيسترخص فيجيب ليكرا او فيزون ويقولوا ون سايز، وتمسطها البائعة وتقولى دي اتخن منك بكتير ووخدها، اقولها طيب هي قبلت على نفسها تخرج فىا لشارع بالمنظر ده، انا ما اقبلش البس كدا، وتستمر معاناتي مع البحث عن لبس قيم فى الخامة، وميكونش ليكرا او فيزون، لحد ما ابتدي الاقي القي مقاسات اسمول وميديم فقط، يعنى وبقيت الشعب ملهمش نفس

هو احنا مقاستنا بقيت صيني اوي كدا، وكنت دايما اروح واقول خلاص انا حلبس منا للى عندي وانا زعلانة ومقهورة انى زدت بالطريقة اللى مش لاقية لبس فيها مناسب وكله ضيق، لحد ما خرجت مع بنت اختي، ادركت ساعتها بجد ان العيب مش فيا، العيب فى الصيني والكوري اللى غطي الشارع المصري ومبقاش فيه غيره.

كل بلد بتتماشي على مزاج شعبها، مش بتمشي شعبها على مزاج الارخص. ياريت نرجع للصناعة المصرية، ونبعد عنا لصينية، عايزين نرجع مصر للصناعة، وخصوصا الملابس اللى كانت متفوقة فيها، عايزة ارجع القي لبس كويس تانى، وحشني انى القي مقاسي فى كل المحلات واتنك واختار براحتي، بعيدا عن الليكرا والفيزون والصيني والكوري.

وحشتني منتجات بلدي، عايزة البس لبس بلدي. عايزة اقول كلمة لكل بنت وفتاة العيب مش فيكي ومش انتى اللى زدتي ابسلولتلى، العيب فى الاستسهال اللى غزا الاسواق، بدل ما نتعب نفسنا ونصنع، بنستورد وخلاص، مش بنساعد شاب مصري انه ينتج ويعمر، لا بنساعد الصين تكبر وتكبر على حساب عمالنا. بنقلل من صناعتنا واللى احنا اساسا متفوقين فيه علشان نجيب اللبس الصيني والكوري.