حامد بدر يكتب لـ موقع أوراق عربية ….. ليه كان قربك من أولها؟ – قصيدة عامية
طب لما انت هتبعد عني
ليه كان قربك من أولها؟
لما فراقنا كان شيء واجب
ليه فتحت لي سكة أكملها؟
***
وعرضت عليا أدوب فيك
وفي عينك أحتار وأداري
كل الشعر اللي يكفيك
كات جمرة مرمية في ناري
***
راضي دلالك راضي سكوتك
بس خصامك شيء أعياني
هو جزاء إني أدوب فيك
تبعد عنه تروح تنساني؟
***
طب لما انت هتبعد عني
ليه كان قربك من أولها؟
كان ليه فكري عشانك يشرد
وفـ سكة غيري تكمِّلها؟
***
شوف يا جميل الطلَّة
شوف يا بهي النظرة
شوف ازاي حولت
اوقاتي
من سكر حلو
لحالة مرة ؟
***
متشكر جدًا ده جزائي
متشكر جدًا على فكرة
***
كان غلطي اني أفكر يوم
إنه حياتي عشانك
ليها بكرة
***
أرجع ألوم واعتب من تاني
على قلب اتجنن على نظرة
وانت القاسي بعيد عن قلبي
بعدك قواني على فكرة
***
على فكرة ،،
بعادك شيء أحسن
حساباتي باعيدها وارتبها
***
بس حـ كرر تاني عتابي
لما انت هتبعد عني
ليه كان قربك من أولها؟
لما فراقنا كان شيء واجب
ليه فتحت لي سكة أكملها؟
لمتابعة المزيد من كتابات حامد بدر – قصائد عامية / موقع أوراق عربية
لمتابعة المزيد من الأعمال بـ موقع أوراق عربية علي فيسبوك
