متخافيش …. مصطفي جمعه الشيشي – موقع أوراق عربية ، قصائد عامية
عاوز أقولك متخافيش
من النهارده ولنهايه عمرنا
ده حبنا ولازم يعيش
عاوز أقولك عشقنا رسمي اتولد
هتكوني أم وبيت كبير ..وهكون سند
ومتزعليش
كل التعب أصبح سراب
الحب طير بيته السما
أما الفراق ..تحت التراب
انا أبوكي وأخوكي وصديق
وإنتي الأمل ..إنتي الحياه
وهعيش معاكي عمرى كله
من الليلادي ..لمنتهاه
وقوليلي أي أحلي من اني
أعيش ف قلبك ..وفيكي أموت
أصل السكن جوه العيون
جوه القلوب مش ف البيوت
و ف يوم هموت
وهعيش ف قلبك ذكريات
حي وكإنه ما حد مات
فاكره أما قالوا حبنا ده مستحيل
وقولنا ببساطه أوي ..
الحب يعمل معجزات
هنعيش سوا ..سبات نبات
ونجيب ولاد وكمان بنات
ونقوم نبات ونبات نقوم
نظره عنيكي مقوياني ف كل يوم
انا بيكي بتحدي الوجع
انا بيكي بتحدي الهموم
عاشقك ..بحبك..مدمنك
جنبك تملي بطمنك
لا هسيب ايديكي
وانتي جنبي مبتسيبيش
عاوز اقولك احضنيني
لما أخاف … ومتخافيش
لمتابعة المزيد من كتابات مصطفي جمعه الشيشي / موقع أوراق عربية ، قصائد عامية
