مأساة شاعر …. منه هاشم – خاص لأوراق عربية

قاعد ع المكتب
ف ايده ورقة وقلم
وجنبه كوباية شاي
عمال يفكر ويفكر
وجوة عقله مية فكرة
وجوة قلبه مليون هم
الدنيا ضاقت بيه
وحياته صبحت كرب
وقلمه مش راضي يطاوعه
وحروفه مش واقفة ف صفه
وسطورة ولا كلمة عليها
والكلمة بينادي عليها
وف نومه صار يحلم بيها
وهيا منه هربانة
وألمه عمال بيزيد
وضايعة منه المواعيد
وأمله بئة عنه بعيد
ويقول لنفسه لازم تجديد
يقوم ويرجع من تاني
يقول لنفسه آه ياني
الكلمة لسة معنداني
واعمل ايه انا ف عذابي
من كلامي المداري
لابد تطاوعني ياقلمي
وسطوري تتملي من تاني
وفجأة كلمته تندهله
تقوله من تاني انا جيتلك
وحروفي واحشاها سطورك
مشتاقة يكتبها قلمك
تلمع عينيه من فرحته
برجوع حروفه وكلمته
ومن جديد يمسك قلمة
قبل اما تهرب كلمته
ف الآخر تتملي سطوره
بقصيدة ياما تعبته