” قليل البخت ” جديد الشاعرة شيماء عبد الله خاص لأوراق عربية

عن سقف الأوضة العالي ..

و ضلّ الضلمة ع الحيط ..

وضحكة بتختفي فجأة .. و ذكرى بتترسم جواك

تاريخ وقف عنده الوقت ..و بكرة زي دلوقت

و إمبارح كان صورة طبق الأصل

من عُمر أساساً ما مشيش قفلت الشيش ..

و خبيت مِ الوجع روحك ..لضمت جروحك التايهة بـِ خيط الشوق

طلعت لـِ فوق ..

و فجأة نزِلِّت ع الأرض

لاقيت إن السما عالية ..

مع إنك أصلاً مش شايف

بتحاول تقنع نفسك إنك مش خايف..

شفايف قلبك المقفول ما بتنطقش

” معلش أنا لازم أمشي ”

جملة فـِ آخر جواب منها …

رميته عشان مافيش مكان فيك ناقص وجع

” انا مش جدع “..

كان رد على نفسك فـِ لحظة عجز

شماعة الظروف جاهزة تستقبل أي فُراق

..هاتشتاق ؟ سنة سنتين ..

و تنسى أوام ” سلام ” آخر كلمة بتقولها ” كلام ”

ناقص حروف تتقال ! سؤال ديماً بدون الرد !

صد الوجع نعمة لما يزيد الضرب

لافيت بلاد الشوق من شرقهـا لـِ الغَرب

الصُدفة مش قابلاك و إن كنت لسة هناك ..

ما تستناش و إن كُنت لسه ماجيتش ..

فـَ لسه الحظ برضه ماجاش قليل البخت كده ديماً ..

..يحمد ربنا لو عاش !

كتبت:شيماء عبد الله