رنا جيرة الله تكتب لأوراق عربية …. زوج في أجازة

رنا جيرة الله تكتب لأوراق عربية …. زوج  في أجازة

ـ أوه حصان انت بتحب كتير كومبلومنتى

ــ مش كومبلومنتى الراجل منا بيحب يسمع الكلمة الحلوة ، الكلمة الحنينة الكلمة الرقيقة ، شوفي مثلا ودانى عجبوكى ازاى وكنتى هتاكليهم مع إننا نعرف بعض من يومين بس الست بتاعت أنا بقالها 5 سنين مسمعتنيش كلمة عنهم تفتح النفس ..

عصام مهندس في إحدى الشركات يحصل على أجازة لمدة شهر يريد أن يتحرر فيها من قيود الزواج ويسافر للإسكندرية علشان يدور على حل شعره زى ما أصحابه قالوله ..وطبعا لأن الكذب مالوش رجلين ف مراته عرفت من خلال إقرار الأجازة اللى نسى يمضي عليه ..

وتسافر جمالات في ثوب جديد وشخصية جديدة “روزيتا ” اللى ينجذب ليها عصام ويقع في غرامها لأنها الصورة الأكثر حيوية من زوجته اللى قال في سره فينك يا ست جمالات تيجى تتعلمى لأن روزيتا اتغزلت في ودانه اللى قال أنا عارف إنهم مش ولابد..

السؤال اللى عمرنا ما هنعرف نجاوب عليه .. ليه الزوجة بتبقى الشخص المضمون اللى بتفقد رونقها بعد كام سنة جواز ده لو مكنش من قبل كده ؟.. وليه الراجل لا يتخلص من شعوره بالانطلاق ودوما متعطش لكلمة جديدة عمره ما سمعها ؟.. حتى لو سمعها من مراته مش بيحس بإن لها بهجة زى ما بيسمعها من أى واحدة تانية ؟.. هل الزوجة كائن مضمون والا كائن روتينى والا كائن أى تغيير جديد عليه يتحول لاستغراب ودهشة ده لو اتلاحظ من أساسه !!..

ايه يعنى غيرت لون شعرها للأصفر والا الأحمر ..

عادى .. هيبص باستغراب ويقولها انتى صبغتى شعرك .. أو “وده غالبا ” هى اللى هتقوله مش شايف حاجة فيا متغيرة ؟..

ايه يعنى ؟!!..

طيب غيرت في استايل اللبس ..

باستنكار وبصه من فوق لتحت ” دماغك مترحش لبعيد إنه معجب بيكى وهيسمعك كلمتين حلوين فوقى كده من أحلام اليقظة دى “.. هيقولك : ايه اللى انتى لابساه ده ؟!!..

المهم إن جمالات أو روزيتا اللى أصحاب جوزها اتجننوا عليها وراحوا لها الفندق بورد ومارونج لايسيه لأنها أكيد أحلى من زوجاتهم ..

وده الحاجة اللى مفيش راجل عمره هيحس بيها إن مراتك اللى مش عجباك أصحابك كلهم بيحسدوك عليها ، إن انت بالنسبة لهم ابن المحظوظة اللى وقعت فيها وجبتها منين ومالكيش أخت يا مدام وطبعا ساعات بتوصل لأبعد من كده ..

لكن الأهم إن الراجل بيبقى دوما عاوز من زوجته إنها تجدد من نفسها وتبقى مكس من هيفاء وروبي ونانسي وبلاش والنبي استايل نيللى كريم ولا أمينة رزق ده لأنه دراما قووى ، لكن الست لازم ترضى بجوزها كده ، وترضى بأى كلمة حلوة لأنه معندوش وقت للكلام الفاضى ده اللى بيحب يسمعه ويقوله بره .. هو انتى عاوزه تبقى مراته ويقولك كلام حلو كمان ..

بس في اعتقادى لو مأخدش باله من استايل لابسك ولا لون شعرك ولا دلعك وشياكتك وجمالك ..

ومش عاوزة أحبطك

ادخلى ع الخطة ب وهى أقرب طريق لقلب جوزك معدته يأكل محشى ويتخمد