اغرب مشهد تخيلت ان عينى تقع عليه….
من المشاهد الصادمة فى السينما المصرية
بمنتهى الصراحة راجعته اكثر من مرة ….
مش موضوع انى اكتب عن الصورة ….
او عن فيلم (البيضة و الحجر) اللى كتبت عنه مرتين منهم مقالة كاملة فى (غريبة الدنيا)…
المشهد نفسه مربك و مدعاة للضحك و البكاء فى نفس الوقت….
نفس الشخص ….هو نفسه …..لم يتغير شكله و لا اسمه ….كل اللى زاد انه سبق اسمه لقب دكتور…..
اتقبض عليه لانه اعترف انه دجال …..
و هو بالفعل كده …..عرف يضحك عن الناس و يلعب على وتر احلامهم الممنوعة …..
المهم و بما ان الاعتراف سيد الادلة يبقى (مستطاع) (احمد زكى ) نصاب و دجال
متستغربش و وكيل النيابة بيرد عليه و يقول له:استغفر الله …ده انت اللى بتوزع الامل الحلو على الناس كل يوم الصبح …هو فيه حد فى البلد كلها مش بيقرا حظك هذا اليوم المنور ببصمتك فى كل الجرايد….
مستطاع:كله فى الهجايص صدقنى….
النيابة : اصدقك و اكذ نفسى ….انا شخصيا مش بتحرك من بيتى الصبح قبل ما اطمن على حظى فى الجورنال
مستطاع:تبقى غلطان
النيابة :يا دكتور التحريات بتقول ان كل الناس اللى اتعاملوا معاك بيأكدوا انك صاحب كرامة و ليك وزنك
مستطاع يرد بعيون زائغة :انا زى اللى لابس بدلة حديد ….كل ما وزنه يزيد جواها تخنقه
النيابة : يعنى انت مصمم انك دجال ؟!
مستطاع:كل شئ اصيح مزيف….المبادئ….الافكار….الناس….حتى نظريات العلم بيفتتها الشكك….و بتهدمها البحوث الجديدة كل يوم….
النيابة:بصراحة انت اجهدت ذهنى….
مستطاع: الناس فى حاجة ليقين….لحقيقة واحدة تكون ثابتة … ده اللى بيخليهم يؤمنوا بحجاب و تعويذة و درويش اهبل بيضحك عليهم ….
النيابة بلهجة حادة:افهم من كده انك بتجهل المجتمع و تتهمه بالجهل
مستطاع: لأ…بالضعف..الضعف مبيفرقش بين جاهل و متعلم ….هما اللى بيخلقوا الدجال و يصنعوه بارادتهم ….زى ما صنعوا مالحجر تمثال و عبدوه
مشهد يخليك تستغرب و تندهش ازاى وكيل النيابة تحول من محقق لمحامى بيستقتل فى الدفاع عن متهم لانه شخصية عامة و مشهورة و ليها اتباع و مؤيدين….انسان اتحول من صادق و صريح مع نفسه ….لدجال غشاش كان بيعرف لفترة يتحكم فى رغباته و شهواته …..دلوقتى اصبحت هى اللى بتتحكم فيه ….انسان اتكلم بصدق قدام محقق قبل كده فاتهموه انه صاحب مبدأ_و كأنها جريمة_ و بعد كده اما غش و كذب و لعب على وجع الناس و اتكلم بصدق رفض المجتمع يصدق انه اكذوبة و انهم كلهم شركاء فى صناعة صاحب الكرامة المزيف
احنا اللى بنصنع الاكذوبة و نصدقها و نعتبرها واقع ؟
هو نفسه بكلامه اعترف انه اكذوبة و انه مش صاحب كرامة و شبه الموضوع بالاصنام او التمثال اللى عبدها الناس فى الجاهلية ….
هل هو مجرد تمثال من حجر صنعه ضعف المجتمع ؟!
تفتكروا فعلا المجتمع اما بيصدق و بيفخم فى اللى زى مستطاع التعظى هو الجانى الحقيقى ؟! و لا شريك فى الجريمة ؟! و لا فعلا ضعيف فبيدور على حاجة تطمنه لانه عنده ايمان ظاهرى لكن معندوش اى يقين بالله سبحانه و تعالى
احنا فعلا محتاجين ثورة على انفسنا !
