جديد الشاعر الشاب محمد بيومى خـــــــــاص أوراق عربية

يا حبيبتي أنا عاشقك لكن

الحب فِ بلدي جريمة ..

الناس شايفينُه خَيابة

و تَفاهة و قِلِة قيمة ..

الحب ف زَمَني تجارة

خُد حاجة و هات كام حاجة ..

لكن اللي يضحي ف حُبُه

ده عبيط و عايش بسذاجة ..

الحب ف عَهدي بَجاحة

ميصَحِش أصلا عيب ..

لكن ينجح و يكَمّل

لو كان عَمْران الجيب ..

الحب ف بلدي اشاعة

أو من ضِمن التخاريف ..

إتعلم تِكدِب أكتر

علشان تِصبَح حَرّيف ..

الحب ف وطني مجرد

حبّة أفلام و اغاني ..

كله إسطوانات محفوظة

و كلها طموحات و أماني ..

يا حبيبتي بحبك لكن

إعلان الحب فضيحة ..

فَـ هَلَمّح و انتي تحِسّي

مش لازم أقولها صريحة ..

الحب مش إني اتنَحنَح

ع التليفون أو ف الشات ..

الحب بوكيه مع دبلة

غير كدة يبقى اشتغالات ..

الحب عَمَار ف القلب

و ولادة للروح من ثاني

و حياة تِتضاف لحياتك

أعظم احساس وجدانى ..

الحب الصح معادلة

موزونة ما بين طرفين ..

هتحِب لوحدك فَكّر

حبك راح ياخدك فين ..

الحب عطاء و سعادة

تِخلق ف القلب بَراح ..

أما لو كان مُتَكَلِّف

فَـ نصيحة بلاش و إرتاح !!

محمد البيومي