أمين نبيل لأوراق عربية ” العادي في زمن الحرية ” – قصائد عامية
أمين نبيل لــ أوراق عربية ” العادي في زمن الحرية ” – قصائد عامية
أوقات
بتكون التوهة مصاحبة ملامحك
والحزن
بيخاصم كل وشوش الناس
وبيسكن وشك
وده شئ عادي
وجايز جدا
لما بتعرف إنك تافه
العادي في زمن الحرية
إنك عنكب
والعنكب بيشد خيوطه
وبينصب لفريسته كمين
بارع جدا في التلوين
وبتتلون بألفين وش
ماهر في الغش
وده رأي أصحابك
العادي في زمن الحرية
إن اللي وهبتها أحلامك
ترفض حتى تدافع عنك
وبتتهمك
بإنك مفصوم الشخصية
وأنها مش ح تقاسمك ذنبك
لما تعيش الوهم سنين
وإن كلامك شي في خيالك
أنت وبس
و أن مقامك مهما تهاتي
مش ح تحس
والموقف ضد التغيير
العادي في زمن الحرية
إنك تبقى يسوع الالفية التالتة
مصلوب على كف الكلمة
وتاجك شوك من طرح زمانك
وأن يهوذا الوقت الحالي
قابض على حرف سؤالك وأنت بتنزف
(الهي الهي لماذا تركتني؟)
العادي في زمن الحرية
أن شباب المثل العليا
لما تحاكمك
تنسى سنين العزلة
والوحدة المفروشة في جدار صمتك
وتساومك على ليلة وحيدة
لتفريغ الشهوة
علي جسم الفقر المتآكل
من نوم الشارع
وأما تفضل شهوة بوحك
تصبح مدعي
بتحاول تجسيد الدور
وبعفوية شديدة بتسقط
لما بتطرح وجهة نظرك
العادي في زمن الحرية
أن الأيام الجاية
تعلن حالة العصيان المدني علي الأحلام
النايمة في قلب التوابيت
وملايكة تعليم السحر
تغوي العامة باسم الدين
وفي حفلة تتويج الشمس
الحبله بحروف التكوين
تولد أمية
العادي في زمن الحرية
إنك تفضل دائما نكرة
مجرور بحروف الوطنية
مكسور بالهمزة الواصلة
مابين تاء التأنيث ورذيلة فعل البشرية
معطوف
علي أخر مشهد في عيون أصحابك
وأنت بتسقط
دمعة بريئة
من التهمة المنصوبة إليك
لمتابعة المزيد من أعمال نبيل أمين بـ موقع أوراق عربية – قصائد عامية
لمتابعة المزيد من الأعمال بـ موقع أوراق عربية علي فيسبوك
