أمين نبيل يكتب لأوراق عربية …. سنينك لأربعين – قصيدة عامية
عديت سنينك لأربعين
زادوا أربعة
جنبك يمين جنبك شمال
كل الدموع متجمعة
تصرخ عليك الذكريات
عمرك وفات
وأنت مصاحب وحدتك
مشهد يمر قصاد عينيك
طول ما أنت ماشي في سكتك
قبلت ناس وفرقت ناس
وناس بتعشق دمعتك
يا غنوتك
موال وناي
من جرح ينزف كلمتك
عديت سنينك لأربعين
زادوا أربعة
زرعت حلم في أرض بور
طرح العدم
والباقي ليك يمكن يكون حبة ساعات
لساك بتعشق السكات
م كل شيء عشقته مات
إلا عيون ست البنات
لساها برضة بتعرفك
ب تلملمك من الدروب الميته
حرفين أنين
وسنين شجن
متقولش مين دفع التمن
ما هو كل حاجة في دنيتك
شبه المحال
بوحك خيال
عقرب بيلدغ م اليمين
يسري ب سمه في الجسد
قلبك مسد
متقولش مين اللي حسد
الله يبارك للجميع
حلمك قصادك
سبته ليه منك يضيع؟
عديت سنينك لأربعين
زادوا أربعة
والباقي ليك نبضتين
والروح مفرقاك من زمان
ف متفتكرش أن اللي فات
هيجي قده
بس الأكيد أن اللي جاي
أنت اللي قده
ولا حد يلويها ايديك
طول ما أنت مالك سكتك
ديما مصاحب خطوتك
عايش زمانك تحكمه
بجده وهزله
