منتدي أوراق عربيةمنتدي شعر العامية

حامد بدر لموقع أوراق عربية …. أنتِ حَوّا – قصيدة عامية

ابن آدم وأنتِ حوَّا
في الشراكة إحنا قوة
مهما قالوا بينا صراع
حاجة زيّ 1000 نوَّة

مهما قالوا !
ابن آدم وأنتِ حَوّا
متقاسمين المحبة
متقاسمينها أيوة أيوة
متقاسمين المودة
متقاسمين الحياة
الطريق حيبقى واحد
لو في ذات الاتجاه
لو في ذات الاتجاه؟
نبني ونكمل حياة.
أنتِ نصي التاني .. اللِّي
دونه ما تكمل حياة
أنتِ عُمْر بعد عُمْر
فيه القلب ضلَّ تاه
أنتِ وصية الرسول
أنتِ عهد مع الإله

أنتِ حالة مش خيال
أنتِ جزء من الحقيقة
أنتِ حالة من مجال
خاطف القلب
شَغَله في دقيقة

في دنيانا مش انقسام
في الحقيقة اتنين حبايب
حاجة غاية الانسجام

طبعك العنود عاجبني
طبعك الجميل يخلِّي
رمشي مش عارف ينام

طبعك العنود مجرَّد
حاجة زي اتنين يناقروا
مهما كان طبعك تمرُّد
مش هينفع يوم يفارقوا

مهما تصفي ولَّا تِقسي
أنتِ أغلى شريكة عندي
مهما قالوا طبعي عِنَدِي
وان طبعي سجن حابس
ردي عنِّي حبيبتي غيبتي
قولي حبيبي ليَّا حارس

واوعي تنسي

أنتِ مش أسيرة عندي
أنتِ ملكة في قلبي جُوَّة
أنتِ أقرب
أقرب التفسير لعِندْي
مهما اعاند انتي حَوَّا

أيوة حَوّا
أيوة حَوَّا حويتي قلبي
واحتويتي قلب جامد
أنتِ حالة مش عادية
و أنتِ اللي عشانها صامد

والخلاف مش خلاف
إحنا بينا اختلاف
إختلاف يبني يكمل
مش “كنقص في الضعاف”

وف نهاية القصيدة
حابب أقولك اعتراف

مهما تعاندي برضو بحبك
مهما قل بينا قربك
الكلام لك
أيوة ليكِ

أنتِ فرح القلب جُوَّة
أنتِ طرح الروح يا حِلوَة
مهما قالوا بينا صراع
ابن آدم وأنتِ  حوَّا

لمتابعة المزيد من كتابات حامد بدر   قصائد عامية  / موقع أوراق عربية 

لمتابعة المزيد من الأعمال بـ موقع  أوراق عربية  / قصائد عامية علي فيسبوك

متابعينا علي فيسبوك
اضغط لتقييم المقال
نشكرك للتقييم ، رأيك يهمنا :)
الوسوم

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
إغلاق
إغلاق