منتدي أوراق عربية

محمود كمال يكتب ….. شخابيط

طب بص انا هشخبط شويه شخابيط بالقلم الرصاص بس انت تلونها واستخدم كل الالوان اللى بتحبها.

لازم تكون مبدع في اي حاجه بتعملها ، لو بتشتغل ايا ما كانت ايه شغلانتك ، خليك فيها مبدع

سواق تاكسي بائع في سوبر ماركت عامل او او او الخ عامل الناس بابتسامه وقول حضرتك ويا فندم وخليك غير

حتى وانت بتلعب خليك مبدع في اللعب وركز كل تفكيرك ازاى تكون مبسوط بلعبك دا ، واداى كل حاجه بتعملها حقها.

اللعب الترفيه القهوة القعده مع الصحاب مش تضيع وقت , دا احتياج ، اعمله واعمل كل حاجه انت شايف نفسك فيها وحاسس انها تسعدك.

بس اوعي تيجي على حساب حاجات تانيه ، خطط ليومك واحلم ببكره وخلى لمستقبلك نصيب من مجهودك.

اقرأ كتير ، كتير اوى كمان .. متخليش يوم يعدى بدون ما تقرأ اقرأ اي نوع من الكتب ثقافه فن سياسه تنميه دين غذي علقك وروحك كل يوم بصفحه في كتاب.

جرب تصحي بدري , افتح الشباك شم ريحه الهوا ، افطر غذي جسمك واملا كيانك.

قلل شويه من المكيفات .. الشاي والقهوة والبيبسي وبدلها بمشروبات صحيه شويه وعلى فكرة اليانسون جميل اوى.

السجاير .. ربنا يعافيك لو بتدخن .. بس لو ابنك شفته بيدخن هتقدر تقوله بلاش عشان عيب او حرام او غلط ع الصحه .. فكر في ابنك حتى لو لسه مجاش.

طب هات موبايلك ، لف في قائمه الاسماء .. هاتها حرف حرف كدا وابدأ اتصل بناس البعد قرب يعمل جفا

هتلاقي فيهم ناس كانت مزعلاك سامحهم وممكن ناس تكون انت مزعلهم طب صالحهم يمكن مستنين من زمان مكالمتك.

طب عارف .. خلى ابوك وامك هم حائط الصد المنيع في ظهرك ، اوعي تكون مزعلهم دول اكتر ناس يتمنوا تكون احسن الناس ، حتى لو وحشين لازم يكونوا ف عيونك احسن ناس وادعيلهم وادعي لنفسك واوعي تقول اوف ، دا رب العزة وصانا عليهم.

وخلى خط الدفاع التانى عنك هما شويه عيال مجانين ، اصحابك .. بيحبوك وانت بتعشقهم.

قبل ما اخلص واحط القلم جوة المكتب مفيش ملايكه بينا دلوقتى ولا انبيا ، هتلاقي كل الناس بتغلط وانت كمان ع فكرة .. اسمح لنفسك انك تغلط متزعلش اوى بس متكررش الغلط دا تانى هتكبر وتعلا ف نظر نفسك واسمح كمان لغيرك انه يغلط ما هو كمان زي وزيك بيغلط سامح واملا قلبك سلام.

وافتكر ان رب العزة سبحانه وتعالى خلقنا بقلب ابيض بيسامح ويعفو ويحب ويشكر ويفرح ويضحك كمان

خلقنا بحب الخير وحب الجمال وحب الحق .. دور على التلاته دول جواك وجوا كل اللى حواليك. …. بحبك .. والله #

محمود كمال - خاص لأوراق عربية بقلم – محمود كمال – خاص لأوراق عربية 

متابعينا علي فيسبوك
اضغط لتقييم المقال
نشكرك للتقييم ، رأيك يهمنا :)

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
إغلاق
إغلاق