مواهب علي الطريق

قالو لي بتحب مصر_بلال عيد/خاص لأوراق عربية

قالولي بتحب مصر

 

سكت وخرجت مني تنهيدة وقلت أكيد

 

من غير ما أحلفلكم بعزة وجاه ربنا المجيد

 

دي غزالة الزمان

 

أللي حبها أتوجد في القلب وهو لسه وليد

 

أنا أبنها المغنواتي

 

وبرضه تلاقيني عسكري واقف بنبوته على الحدود

 

يامه ياماي عايز ياأم الخير أحكيلك

 

وياريت ياأم الجبين مريمي تكوني سامعاني

 

عاوز أترمي في حجرك وأبكي وأشكيلك

 

دي الشكوى في القلب جمرة نار ومرار أه ياني

 

ياأم العيون شطوط

 

أنتى مش غريبه وعارفه إن الغلا بقا غول

 

أل أيه بيستوردو لنا الدوا للعيال حتى زيت الفول

 

وأبنك المطحون اللي كان حجر في هرم فرعون

 

النهاردة بقا حيران بين طوابير العيش والدمعه ملت العيون

 

 

وقالولي بتحب مصر… قلت ياعالم أكيد

 

أم الشوارع نور والمزارع نيلاني

 

دي الخاله للجميع.. وحبها فرحة لبس العيد

 

أمي هي وحبيتي هي وهي اللي فاهماني

 

 

أل أيه بيسألوني.. أنت صحيح بتحب مصر

 

قلت هو من أمتى الحب في القلب محتاج لآماره ودليل

 

أسألوا سومه ليه غنت سنين في عشقها

 

ولا حلُم ليه حلف بسماها وتراب أرضها

 

مصر هي هاجر أم العرب

 

اللي خلفت جنب الكعبه سيدنا أسماعيل

 

أسألوا يعقوب أو سويرس عن طيبة شعبها

 

وزويل عن سر العلم في هرمها وحضارة أهلها

 

مذكوره متحصنه من عند ربنا ..

 

أمنه في أيات الذكر والتنزيل

 

أسألوا سيدنا يوسف

 

هو أزاي حبها وهو خازن الحب وقمحها

 

وشنوده لو دور هايلاقي ذكرها منسي في الآناجيل

 

والطاهره أم المسيح

 

أستخبت من ظلم الرومان بين دروب حبها

 

 

ولسه بتسألوني بتحب مصر…صرخت وقلت أكيد

 

دي مصر أرض القمر اللي حبها نبض وألم وشجون

 

يابهيه والله عاشق أنا لترابك الزعفران وحبك صرخة وريد

 

أنا أبنك المعجباني.. اللي رغم الشكوى

 

بيصرخ بأسمك مصر .. مصر كل مايجي جون

 

ولادك العدوي والشعراوي وحسان

 

رافعين أزهرك فوق منبرك وحافظين للقرأن المجيد

 

والجوهري وشحاته وأبو تريكه

 

رافعين أسمك والعالم بيك بقا مجنون

 

فى النهايه لو سألوني عن حبك .

 

هاصرخ وأقول بحبك يامصر بشكل عنيد

متابعينا علي فيسبوك
اضغط لتقييم المقال
نشكرك للتقييم ، رأيك يهمنا :)

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
إغلاق
إغلاق