منتدي أوراق عربيةمواهب علي الطريق

غريب يا مصر ماشي …. مينا ناصف / المركز الثالث – مسابقة أوراق عربية

المتسابق : مينا ناصف

حصلت القصيدة علي المركز الثالث في تقييم لجنة التحكيم والمركز السادس في تصويت القراء

غريب يا مصر ماشي
————————–———-

“غريب يا مصر ماشى
في دروبك وف حواريكى
بصوتي أعافر أناديكى
الاقيكى … صبية وشابة
كل العيون تشتهيكى”

مصر الزعاق والظيطة
الدوشة والظمبليطة
والناس القليطة
والخلق البسيطة
قاعدين جنب الحيطة
وأنت مدريناشى
غريب يا مصر ماشى ……….
وأحبك و آجى ليكى
ارمي الغنوة ف عنيكى
د أنا مهما اديكى … ما يكفيكى
بحبك … وأعمل إيه فيكى ؟
بحبك وأعمل إيه ؟
بحبك يا بنت الإيه
وحبي منتهاشى !
غريب يا مصر ماشى…………
وأنت معفرتانى مجنانى
ف حبك مدوبانى
لماَني مبعترانى
مبعدانى مقربانى
موديانى جيبانى
مدوخانى مغربانى
مجرجرانى ممرمطانى
وبردك حضنانى
وعنيكى منيماشى
غريب يا مصر ماشى ………….
وأنت بنت بلد
أم الشابة والولد
حبك ف قلبي أتولد
دموعي مالها عدد
بقول لعنيكى مدد
يا أمو الصبي والجدع
وضرب الودع
بحبك يا أمو البدع
وحبي منتهاشى
غريب يا مصر ماشى ………
رغم الضجيج والغلوشة
رغم البكا والنغمشة
الضحك والفرفشة
الزعاق والوشوشة
العقل والدروشة
مصر الطايشة
مصر العايشة
الساكنة جوى الحشا
وجوايا مكرهاشى
غريب يامصر ماشى ………
مصر البداية
مصر النهاية
أنت الكلماية
السورة والآية
حبك حكايا
عايشه جوايا
فصوت الادان
ودق الجرس
فوقت الأمان
العسس والحرس
أنت المرة
أنت الحرة
أنت الدرة
الليل وطاويط
وكلام غويط
العاقل والعبيط
الباشا والبسيط
فيكى الشخابيط
فيكى الاخابيط
بلد الحواديت
عليها وعيت
اقولها ومنسهاشي
غريب يا مصر ماشي ……………….
فيكى الجنون
والضحك على الدقون
واللعب بالواو والكاف
والييه والنون
وكلام الدش
والصدق والغش
يا مصر معلش
لومنك متسمحناشى
غريب يا مصر ماشى…………….
فيكى التوبيخ
الهدوء والصريخ
الجغرافيا والتاريخ
القسيس والشيخ
أنت التواشيح
أنت التفاريح
أنت التباريح
الطوفان والريح
ولا ريح هزناشى

غريب يامصر ماشى
ف دروبك وف حواريكى
بصوتي اعافر اناديكى
الاقيكى صبية وشابة
كل العيون تشتهيكى

متابعينا علي فيسبوك
اضغط لتقييم المقال
نشكرك للتقييم ، رأيك يهمنا :)

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
إغلاق
إغلاق