علا عبد الرؤف تكتب لأوراق عربية ….هي عدوي ؟!

لما كان قلبنا علي قلب بعض ، والفرح واحد وفي الحزن نقف ونساعد . كانت ابواب بيوتنا متتقفلش ، والطبخة عندي وعندي جاري واللقمة نقسمها سوا ، وابني ابنه لما كانت العشرة حقيقة ولها معني مش كلام ، لها اثر وفعل

لما كان في الحتة رجالة جدعة وفي المواصلات يقف للعجوز ولست واقفة

تفتكروا كانت عدوي اخلاق ؟!

ولا كان منهج حياة لناس عاشت في الوقت ده ؟

مدارسنا بتربي من قبل ماتعلم ، والمدرس كان اب ومربي والمدرسة ام بيساعدوا زي البيت في التربية ، وكانوا سبب ان في جيل متعلم صح

كان في ضمير ، دي تبقي عدوي ؟؟

ايوه كان العلم نور .. لما كانت المدارس مش بس علم ، كانت نادي وفسحة وحاجة تفرح

لما كان في نشاط ويا الزراعة والطبيخ

ايوه تسعد لما كان اللعب بيخلينا سعدا بجد … وبيعلمنا نفرح

كانت عدوي ؟؟

وكانوا بيحترموا الكبير ، ودي سمة غالبة دلوقتي ندرة وبنستغرب

ياريتها عدوي ..

ريحة شوارعنا طيبة واصالة ، وصوت لراديو وطعم تاني للصباح ، تسمع صباح الخير ياخلق حالنا واحد والرزق جاي يافتاح ياعليم يارزاق ياكريم والشمس تحكيلنا الجمال

دي تبقي ايه ؟ عدوي جميلة

الخير كتير والناس بسيطة وكلامها بلسم ، وكان في مشاكل بس القلوب الطيبة بتنسي كل الهموم

هي عدوي ؟؟

لما كان الحب من غير فعل يلوثه وكان برئ وقلب طاهر ، لما كان للغير صيانة مش فضيحة ولا كان عار ، حب عفيف

عدوي حب طاهر مش سرقة ولا لعب بمشاعر

ياريت ترجع تعدي وتنشر زمن جميل ياريتها عدوي