رحلة تحرش …. عن حياة الأنثي العربية بقلم رباب طلعت
دورة حياة البنت العربية تبتدأ وتنتهي عند نقطة التحرش , من اليوم الأول لخلقها , وأول مالخبر السعيد يملى أرجاء بيت العروس الجديدة ومع أول كلمة ( مبروك أنتي حامل ) من الطبيب أو الطبيبة المختصة , مرورا بفرحة زوجها , واحتفال أهل كلا منهم يتم التحرش بالفتاة انسانيا
بداية بالام الي بتتمنى ولد يكون هو ولي العهد الي يسند ظهرها والأب الي عاوز ولي العهد الي يشيل اسمه , وأم الزوج الي تتمنى لابنها يكون ابو الرجالة , وام الزوجة الي عاوزة بنتها تجيب الولد الي هيرفع راسها في العيلة , مع حزن الاب والام لما الطبيب يقولهم انها بنت !! وخيبة امل الاهل وكلمات المواساة الشهيرة ربنا يتمملك بخير عقبال متيجبي الولد!
ومن ثم ولادة البنت واستمرار مسلسل التحرش الي ابتدت اولى حلقاته وهي نطفة في رحم الأم .
تولد البنت ومع عاطفة الأبوة والأمومة تبقى قرة عينهم ويبدأوا في مراسم الاحتفال بالمولودة ويتم أولى مراسم تكفين الفتاة في توب الجمال , وتعليقات المباركين دي سمرا , شعرها مش ناعم , مأخدتش حلاوة مامتها , او زي القمر شكلها هتطلع شبههك , عينها خضر , شعرها ناعم , عقبال متشوفيها عروسة , وتكبر البنت تدريجيا ويجي عيد ميلادها الأول والثاني والعين على البنت بتزيد , والمقارنات ما بينها وبين أقرنائها جماليا وشكليا بتزيد وبتعيش البنت في صراع المراية !! وبتقتصر ألعابها على العروسة وألعاب المطبخ والخياطة وخلافه ! وهوايتها اللعب بمستحضرات تجميل والدتها !
وتمر الأيام وتكبر (العروسة) الي تبقى محظوظة انها متعرضتش للتحرش الجنسي في طفولتها , والي حتما هتتعرضله في مراحلها العمرية الي جاية , وتبدأ معاناه أكبر مع التحرش الفكري الي بيكبر كل أما تكير , متجريش, متعليش صوتك , متركبيش عجل , متروحيش. متجيش , جيبي لاخوكي مية , اعملي لاخوكي شاي , لا ممنوع الخروج , لا ممنوع الكلام , لا ممنوع ممنوع ممنوع وكل حاجة في الحياة ممنوع عشان انتي بنت مش ولد !
تبدأ البنت تكبر سريعا ولائحة الممنوعات والحَجر تزيد , انتي تبقي دكتورة او مدرسة , هي دي شغلانات البنات , الكلية دي ممنوعه والكلية دي بعيده , والوظيفة دي مش للبنات , والكلية دي شغلها صعب , انتي هتدخلي كذا طبقا لمجموعك او كذا تلبية لطلبات الوالدين والاهل والجيران والصحاب.
جبتي عريس ؟ حد شافك ؟ في فرح لازم تروحي معانا , في عيد لازم نروح نعيد على خالة بنت عم ابن جد خال عمك , لازم نود الناس أصل عندهم عرسان ؟!
شايفة فلانة بتعمل ايه ؟ شايفة لابسة ايه ؟ هو انتي مش بنت زي البنات ؟ اتحركي زيهم عشان تجيبي عريس .
بتحبي حب ايه ؟ هيأكلك عيش انتي متعرفيش مستقبلك , شايفة فلانة اتجوزت ايه ؟ ودفع فيها كام ؟ وعايشة ازاي ؟ انتي فازة الي هيدفع قيكي اكتر يشيل , اكبر منك مش مهم مهو لازم يبقى اكبر منك . المهم عنده شقة وهيعيشك مرتاحة !
بس أنا مش عاوزة اتجوز , أنا ليه طموح , أنا عاوزة أشتغل , عاوزة أكمل دراستي !!
دراستك ؟؟ مش كفاية الجامعه ؟ انتي عاوزة توقفي نصيبك مش كفاية متجوزتيش وانتي في الجامعه ؟!
انتي اتخرجتي من غير متتجوزي فانتي بقيتي عانس واحمدي ربنا وارضي بالي يجيلك , فيها ايه اقل منك في التعليم , فيها ايه شكلك مش عاجبه بطلي هيافة ؟ يعني ايه تافه وملوش فكر ؟ الراجل ميعيبوش الا جيبه ؟! مبيصليش ! بكرة ربنا يهديه !
اتجوزتي ؟؟
مرتاحة ؟
لا
مش مهم مش بيصرف عليكي ؟ احمدي ربنا حد طايل عيشتك !
بيضربني!
مش مهم اكيد انتي الي غلطانة انتي اصلا طول عمرك لسانك طويل !
انا ؟
اه انتي . انا عاوزة اطلق ده بيشرب , بيخوني !
استحملي عشان ولادك , الاحسن ليه وليهم الطلاق .
لا عيشي .
انا هطلق !!
اطلقتي ؟
مكنش عارف يلمك كنتي مجنناه !
أنا ؟؟
أه انتي بكرة يتجوز ست ستك , وانتي تفضلي كده (مطلقة) وصمة عار !!
متجوزتش فيها عيب , اطلقت فيها عيب , اتيتمت فيها عيب , اتجننت فيها عيب !! مهما عملت خلاف الخطوط المرسومة لحياتها فهي اكيد فيها عيب؟
ليها فكر مختلف عنهم فيها عيب .
فيها عيب يعشان بتقرأ وعشان بترسم وعشان بتعزف , فيها عيب عشان ليها طموح وليها احلام , فيها عيب عشان مقاستش نفسها بالجمال وانما بالعقل .
فيها عيب عشان مش عاقلة زي غيرها من الي وافقوا عالتحرش الفكري والانساني وسكتوا.
فيها عيب عشان تمردت وقالت لا امنع_متحرش قالت لا انا ليا فكر ممنوع التحرش بيه .
بقلم رباب طلعت – عضو حملة إمنع متحرش – برعاية أوراق عربية
لمتابعة صفحة الحمله علي الفيس بوك ( امنع متحرش)
بجد مقال رائع بالفعل ألقيتي الضوء علي أنواع من التحرش لا يتطرق لها الكثييرون وهي تعادل التحرش الجسدي أو اكثر بالتوفيق