مواهب علي الطريق

رئيس من الثوار _شعر محمد قطب /خاص لأوراق عربية

 

مهما طـال الليل لابد يجي علينا نهار

مهما طال الوقت بكره نقطف من الثورة ثمار

 إسقاط نظام فاشل وحاشية بالنسبالي انتصار

مش طالب زيادة ولا إثابة ولا هاركب التيار

ولا جمعه ولا مليونيه فيها التيه تحت ستار

ومطالب فئوية ويافته بشعار مستعار

لازم نصبر وبعد الضلمه هايجي نهار

ونعمل وقفه قويه لكل عميل سمسار

هدفه يشعل فتنه ويهد علينا الدار

باتمني يكون لي رئيس برلمان من الثوار

ومايكونش زي البعيد سي السيد سيد قرار

يشوف صالح الشعب وحكيم ومش جبار

وذمه نضيفه مش نازل طالع واكل زي المنشار

ويكونله ضمير حي وصاحب راي وكمان افكار

ويعمر سينا ويخطب فينا والتنميه له ولينا شعار

ويزرع قمح ورز وقطن وحتي الصحرا خضار

لجل ما يرحم افقر واحد فينا من جشع التجار

ويعمل حد ادني واقصي ووقفه للاسعار

يومها لاها نشوف ازمة رز وسكر ولاحتي بنزين وسولار

ساعتها العاطل يُملك بدل الكشك بزار

وارحم امي من وقفتها ع الناصيه بمشنة فجل وخضار

وادوق طعم اللحمه وابقي زبون عند الجزار

واقول للفول ملعون ابو شكلك صدري مولع نار

واخطب حته موزه ونقضي الليله هزار

وابعد عن دلوعة الشات ومش هاعمل معاها حوار

واركب حته فيات انا وسيدة الدار

وابعد عن أي زحام واقوله باي باي يا قطار

نفسي في حتة ارض من ال سرقها الاشرار

ابني عليها فيلا وحراسه خلف الاسوار

ولا كام مليون من اللي هربها الشطار

واعمللي كام مشروع انا وولادي الصغار

نفسي اتمتع بالدنيا من غير ما احتار

بقلنا كتير طعم اللقمه متغمس بمرار

نفسي انام وبابي مفتوح مش خايف من الجار

ولا يبص علي مراتي وهي بتغسل من خرم جدار

نفسي اروح مكه لو راكب إنشاله حمار

نفسي اشوف غزه ومكه من غير ما البس منظار

ملهاش لازمه التأشيره لزيارة عمار

ماهو من دمي ومن لحمي والدار جنب الدار

نفسي يكون لي رئيس من الثوار

حاسس بيا وداق الظلم ومرار الاستعمار

يسمع صوتي ويطفي بنفسه من جويا النار

ويطلع من جوايا الجن انشاله حتي بدقة زار

عايزه يكون مدني متسلح باحكام الاحرار

ويكون واضح ويايا ومفيش بنا يا ناس اسرار

ويكون ابن ابوه وراضي عليه وبار

ويقضي ما بينا بٌسنه نبينا سيد الابرار

بقلم  :محمد قطب- كفر الشيخ_خاص لاوراق عربية

متابعينا علي فيسبوك
اضغط لتقييم المقال
نشكرك للتقييم ، رأيك يهمنا :)

مقالات ذات صلة

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
إغلاق
إغلاق