حامد بدر يكتب لموقع أوراق عربية …. الزم بيتك – قصيدة عامية
الزم بيتك انت وهو
انت وهو
ارجع على
بيتك
ما انتش حِمل العدوى
يا صاحبي
روَّح دارك واترك
غيطك
***
ده اللي يصيبنا مش
أنا وانت
راح هيصيب
غيري وغيرك
فـ الزم بيتك
***
نازل ليه ؟
نازل تتمشى؟
ولا اياك
رايح تتعشى؟
لو مت هنُكْنُس
بـ مقشة
بص إيطاليا وشوف الصين
بص لغيرك
***
ارجع لاهلك
وبلاش تعند
والزم بيتك
***
وعّي اصحابك
واهل الحيّ
اصرخ قبل ما تغرق
بينا
أصل الكارثة
دي ما ليها زي
فاعمل زي ما
قالك خيّ
و #الزم_ بيتك
***
وولاد بلدك إياك تنسى
أهل الشارع وأهل
الحارة
بس اوعاك
تغفل وتعدِّي
للِّي يولع ألف
سيجارة
أو تتجاهل
يوم مناداتي
ترجع تندم
تقول “يا خسارة”
فاحفظ نفسك
واحفظ غيرك
***
نادي بعلو الصوت
لله
كتّر من شكرك
ودُعاه
قوم اتوضى وصلِّي
وكبَّر
لما تصلِّي
صلِّي في بيتك
بس ضروة
تطهّر فرشك
واغسل ايدك
***
واللي يقابلك
قالك سلِّم
ارفض قله بعيد وهناك
قالك هزعل
قله ما تزعل
هو انا عايش يوم برضاك
لو بتحبني ابعد حبة
وارجع سكنك
والزم بيتك
***
قبل ما امشي
ألف وصية
مش نقصانا كتر خيرك
ده اللي يصيبنا مش
أنا وانت
راح هيصيب
غيري وغيرك
***
فـ اوعاك تنزل
مش هتفوت
احنا في أزمة تساوي
الموت
لما تصيب
بتصيب وتشوط
طب على ايه
ما كفاية يا صاحبي
هلزم بيتي
والزم بيتك
