إني كنت من الظالمين ….. محمد البيومي – خاص لأوراق عربية

إني كنت من الظالمين ..
إني كنت من الضايعين ..
إني عشت الدنيا لنفسي
و ناسي حسابك يوم الدين ..

إني عملت ذنوب بالكوم ..
او أهملت الفَرض ف يوم ..
إني جريت على رزقي لكني
وقت الفجر اخترت النوم ..

إنى عصيتك و انت ساترنى ..
إنى نسيتك و انت فاكرنى ..
إني بعدت و سبت طريقك
لطريق فيه الذنب آسرنى ..

إني ف شِدّتي رُحت لـ غيرك ..
إن أنا ياما طمعت ف خيرك ..
و بترزقنى و بتكرمنى
و مَقَدّرتَكش تمام تقديرك ..

إني على أمي علّيت صوتي ..
و مخوفتش من لحظة موتي ..
إني شفت الظلم بيكتَر
و كنت بساعده و لو بِـ سكوتي ..

انى قسيت و هجرت كتابك ..
و استهترت ف يوم بعذابك ..
اني سألت الناس من دونك
و لا فكرت اقف على بابك ..

إني توهت مع التايهين ..
ف دنيا تاخدنا شمال ف يمين ..
و خايف تبقى غضبت عليا
أو تكتبنى من الضالّين ..

 محمد البيومي – خاص لأوراق عربية