أنا مش شاعر …..محمد البيومي / المركز الأول بتقييم لجنة التحكيم وتصويت القراء – مسابقة أوراق عربية

المتسابق :- محمد البيومي
حصلت القصيدة علي  المركز الأول بتقييم لجنة التحكيم وتصويت القراء أيضا في  مسابقة أوراق عربية

 أنا مش شاعر ..
————————–

و مين كان قال أنا شاعر ؟
دانا يادوب واحد حساس ..
عايش بيشوف بنور قلبه
و كتفه يشيل هموم الناس ..

و هو القلب ايه دوره .. غير بس يحس بالاوجاع
و مين مهموم و مين محروم .. و مين اتعرى أو مين جاع ..

و مين قال إن أنا شاعر
انا لا ليا ف الدواوين .. ولا بكتب كلام واعر
انا حاسس .. انا لامِس ..
قلوب غرقانة ف مشاعر ..

حاسس بقلوب كثير حبّت ولا طالِت
و حاسس بارواح كل يوم بتموت ولا قالت
و حاسس ف العيون برسايل اتمنعت ولا اتقالت ..

ما الشعر كوم احساس مرصوص ف شكل كلام
تشوف فتحس .. فتفكر فتتأثر .. فيجي لك الالهام
تقراه على غيرك .. يلمس حاجات جواه .. فيتمزج يقول يا سلام

الفكرة مش ف صياغة .. الفكرة ف المعنى
الفكرة ف احساس واحد .. يسيطر و يِجْمَعنا
الفكرة ف حد حنون ف عز سكوتنا يسمعنا
ف حد يحس اوجاعنا ..
ف وقت غلطنا يمنعنا ..
و ف الاحباط يشجعنا ..
ف حد يحس بقلوبنا ..
مش احنا ياما دارينا زعلنا بالضحكة و وقت الفرحة دمعنا ؟!

و دي رسالتي
أحس و أعيش حالة غيري .. و مش لازم أعيش حالتي ..

يعنى اما تفرح واجب .. آجي اهنيك و ازغرطلك
و لما تبقى يوم محتار .. نفكر سوا و اخططلك ..

و إن يوم تكون زعلان .. عيني تتملي لك دمع
و إن يوم تحس بعجز .. انا ليك البصر و السمع ..

انا حاسس بكل ضعيف من غير حتى ما يتكلم
ميحسش باللي فيه الجرح غير حد زيه بتألم ..

فلا أنا شاعر ولا كاتب ولا محترف .. أنا هاوى
انا غاوى .. و مش ناوي اكتب كلام هايف يترص ف غناوى ..
انا لا قلت بقرا الغيب ولا ساحر ولا حاوى
انا كل حلمي اشوف الحزن متهون و اشوف الجرح متداوي ..
ده العمر من غير حلم .. ضايع ولا يساوي ..

فلا تقول إن أنا كاتب ولا تصنفنى م الشعراء ..
أنا تصنيفي وسط الناس .. هعيش و هموت من البسطاء