منتدي أوراق عربيةمنتدي شعر العامية

يدوب إمضا …. عادل أبو نسله – خاص لأوراق عربية

 

 بيرعبنى فيوم أتباس على خدى
دموع تنزل ولا يشعر بها جلدى
بيرعبنى مكونش اساسى وسط الناس
مليش الحق فى الضحكة
ولا الكلمة ولا اللمة
ولا النومة ولا القومة
ولا ف لقمة ولا عزومة
ولا ف أنفاس
☆بيرعبنى مكونش أساسى ف الدنيا
وعمرى يفوت كما الثانية
وأفوت جتة فى كام خشبة
بيرعبنى لأول مرة فى الأيام
أسيب بيتنا وأنا خارج
ومدوسش برجلى عالعتبة
وأفوت حافى
ولابس لبس مش تفصيل
مفيش رؤية
وكل الدنيا فعيونى ضلام وليل
أفوت والناس محاوطانى
وكل أصواتها فودانى
ملخصها صراخ وعويل
☆بيرعبنى أكون ذكرى
مجرد صورة مركونة
فى كارت قديم ملوش لزمة
نساه اعز أصحابى ما بين
كراكيبه فى الخزنة إل أخر البيت
مجرد صورة مركونة
فى وسط رواية مهدية
لأول بنت أنا حبيت
مجرد كلمة مكتوبة
فى نوتة قديمة لصحابى وانا فجامعة
كلمة لذكرى كانت بينا
لكن تاهت تفاصيلها مع الايام
كما الاحلام
حاجة حلوة بنشوفها لكن غامضة
كما الأحلام
بننساها بدون أسباب ولا دافع
مجرد زحمة الواقع
مجرد صورة مركونة
مجرد ذكرى مجنونة
مجرد كلمة مكتوبة
بيرعبنى أكون فيها
يدوب ” إمضا “

متابعينا علي فيسبوك
اضغط لتقييم المقال
نشكرك للتقييم ، رأيك يهمنا :)
الوسوم

مقالات ذات صلة

‫4 تعليقات

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى
إغلاق
إغلاق